गौरीगंज १०, भदौ / गौरीगंज गाउँपालिकाले शिक्षा क्षेत्रमा ठुलो फड्को मार्दै लुम्बिनी बौद्ध विश्वविद्यालयसँग स्नातक तहको चारवर्षे प्राविधिक तथा सूचना प्रविधिका विषयमा कक्षा सञ्चालन गर्ने सम्झौता गरेको छ । यस सम्झौतापछि गाउँपालिकाभित्र उच्च शिक्षाको पहुँच अझ सहज हुने छ ।
सो सम्झौतामा गाउँपालिकाकी अध्यक्ष फूलवती राजवंशी र लुम्बिनी बौद्ध विश्वविद्यालयका उपकुलपति डा. सुर्वणलाल बज्राचार्यले संयुक्तरूपमा हस्ताक्षर गरेका थिए । सम्झौता पत्र आदान–प्रदान कार्यक्रम हिजो सोमबार विश्वविद्यालयको सभाहलमा सम्पन्न भएको हो । समझदारी अनुसार विश्वविद्यालयले संस्कृति आदानप्रदान भाषा शिक्षण, अनुसन्धान कार्य सञ्चालनका लागि काम गर्नेछ।
गाउँपालिकामा स्नातक तहका प्राविधिक र सूचना प्रविधि सम्बन्धी कक्षाहरू सञ्चालन गर्ने गरी भएको यो सम्झौताले यहाँका विद्यार्थीलाई काठमाडौँ वा अन्य सहर धाउनुपर्ने बाध्यता घटाउनेछ । यसले ग्रामीण भेगका विद्यार्थीलाई गाउँमै उच्च शिक्षा हासिल गर्न सक्ने वातावरण तयार गर्ने विश्वास गरिएको छ ।
सम्झौता पत्र आदान–प्रदान कार्यक्रममा विश्वविद्यालयका रजिष्ट्रार डा. तिलकराम आचार्य, झापा दमकका राजनैतिक तथा सामाजिक व्यक्तित्व गोविन्द थापा लगायतको उपस्थिति थियो ।
गाउँपालिकाकी अध्यक्ष फूलवती राजवंशीले गाउँमै स्नातक तहका कक्षा सञ्चालन हुनु गाउँपालिकाका लागि ऐतिहासिक उपलब्धि भएको बताइन् । उनले विद्यार्थीहरूलाई आफ्नै गाउँपालिकामा बस्दै गुणस्तरीय शिक्षा हासिल गर्न सकिने वातावरण बनेकोमा खुशी व्यक्त गरिन् । उपकुलपति डा. बज्राचार्यले ग्रामीण तहमा उच्च शिक्षा विस्तार गर्नु विश्वविद्यालयको प्रमुख उद्देश्य भएको उल्लेख गर्दै यस सहकार्यलाई दीर्घकालीन बनाउन प्रतिबद्धता जनाए ।
यसअघि उच्च शिक्षा प्राप्त गर्नुपर्ने विद्यार्थीहरूलाई टाढा जानुपर्ने बाध्यता थियो । तर, अब गाउँमै सूचना प्रविधि र प्राविधिक शिक्षाको अध्ययन गर्न सकिने भएकाले गाउँपालिकामा शैक्षिक अवसरको नयाँ ढोका खुलेको छ । यस सम्झौताले स्थानीय तहमा शैक्षिक विकाससँगै सीपमूलक जनशक्ति उत्पादनमा महत्वपूर्ण योगदान पु¥याउने अपेक्षा गरिएको छ ।
