गौरिगंज ६, भदौ / गौरिगंज गाउँपालिका वार्ड नं. ५ निवासी जसना कुमारी गन्गाई हालै गौरीगंज गाउँपालिकामा अधिकृत पदमा पदोन्नति पाउँदै गन्गाई समुदाय अन्तर्गत महिलामध्ये सम्भवत पहिलो अधिकृत बन्नुभएको छ ।
कोशी प्रदेशको स्थानीय सरकारी सेवा गठन तथा सञ्चालन ऐन, २०८० को दफा २७ को उपदफा १ र ४ बमोजिम गठित तह वृद्धि सिफारिस समितिको सिफारिस र गाउँकार्यपालिकाको निर्णय अनुसार उहाँलाई अधिकृतस्तर छैठौं पदमा पदोन्नति दिइएको हो । यस उपलब्धिले गाउँपालिका मात्र नभई सम्पूर्ण गन्गाई समुदायलाई गौरव दिलाएको छ ।
जसना कुमारी गन्गाईले आफ्नो करियर २०७६ साल फागुन २२ गते नेपाल सरकारको शिक्षा प्रशासन सेवाअन्तर्गत पाँचौँ तह प्राविधिक सहायक पदबाट सुरु गर्नुभएको थियो । मेहनत, लगनशीलता र कर्तव्यनिष्ठाका आधारमा छोटो समयमै उहाँले उल्लेखनीय प्रगति गर्नुभएको छ । शिक्षा संकायमा स्नातक उतीर्ण भएकी जसना हाल गौरिगंज गाउँपालिकामै कार्यरत छिन् ।
समाजमा प्रगतिशील सोच र महिला सशक्तीकरणको सन्देश फैलाउन जसनाको यो उपलब्धि महत्त्वपूर्ण मानिएको छ । विशेषगरी गन्गाई समुदायमा महिला शैक्षिक तथा व्यावसायिक रूपमा अगाडि बढ्न अझै पनि चुनौतीपूर्ण परिस्थितिहरू रहेको अवस्थामा उहाँले पाएको यो सफलता प्रेरणादायी उपलब्धि बनेको छ ।
स्थानीय बासिन्दा र सहकर्मीहरूले जसनाको पदोन्नतिलाई स्वागत गर्दै उहाँको कर्मठता, इमान्दारिता र जनसेवाप्रतिको समर्पणलाई प्रशंसा गरेका छन् । गाउँपालिकाको नेतृत्वले पनि समुदायमा सकारात्मक उदाहरण प्रस्तुत गर्न सक्ने महिला अधिकृतको रुपमा जसनाको योगदान अझ सशक्त हुने विश्वास व्यक्त गरेको छ ।
गौरिगंज गाउँपालिकामा आफ्नो सेवाकालमा निरन्तर रुपमा जिम्मेवारी निर्वाह गर्दै आउनुभएकी जसना कुमारी गन्गाई अब अधिकृतको हैसियतमा अझ उच्च दायित्व वहन गर्न तयार रहेकी छन् । उहाँको पदोन्नति गाउँपालिकाको प्रशासनिक कार्यसम्पादनमा मात्र सीमित नभई महिला सशक्तीकरण र गन्गाई समुदायको पहिचान अभिवृद्धिमा समेत महत्वपूर्ण कदमका रूपमा लिइएको छ ।
जसना कुमारी गन्गाईको यो सफलता व्यक्तिगत उपलब्धिमा मात्र सीमित नभई समुदाय, गाउँपालिका र समग्र समाजका लागि प्रेरणादायी कथा बनेको छ ।
