काठमाडौं ११, साउन / समूह चरणमा दुवै खेल जितेको सशस्त्र प्रहरी बलको एपीएफ क्लबले महिला क्रिकेट छनोट प्रतियोगिताको फाइनलमा मंगलबार उपाधिका लागि पूर्वाञ्चलसँग खेल्दैछ ।
वर्षाले खेल रोकिएपछि नेट रनरेटका आधारमा सुदूरपश्चिमलाई उछिन्दै पूर्वाञ्चलले एपीएफसँगको फाइनल भेट पक्का गरेको हो । त्रिभुवन विश्वविद्यालयको कीर्तिपुरस्थित मैदानमा समूह ‘बी’ को अन्तिम खेलमा सोमबार टस जितेको पूर्वाञ्चलले सुदूरपश्चिमलाई ब्याटिङको निम्तो दिएको थियो । वर्षाका कारण खेल १८ ओभरमा छोट्याइएको थियो ।
पूर्वाञ्चलको कसिलो बलिङसामु निरीह देखिएको सुदूरपश्चिमले जम्मा ५ रन जोड्दै ६ विकेट गुमाइसकेको थियो । वर्षाले खेल रोकिनुअघि उसले ७ रन जोडेको थियो । ७.२ ओभरको खेलसम्म पूर्वाञ्चलका कविता गौतमले तीन र सन्तोषी चौधरीले दुई विकेट लिएका थिए । त्यसपछि वर्षाले खेल अवरुद्ध भयो । त्यसैले नेट रनरेटका आधारमा सुदूरपश्चिमलाई पन्छाउँदै पूर्वाञ्चलले फाइनल यात्रा तय गरेको हो । दुवै टिमले समूह चरणमा पश्चिमाञ्चललाई हराएका थिए ।
समूह ‘ए’ मा दुवै खेल जितेर यसअघि नै एपीएफले फाइनलमा स्थान सुरक्षित गरेको थियो । यस समूहको अन्तिम खेलमा सोमबार मध्यपश्चिमले मध्यमाञ्चललाई ५ विकेटले पन्छाएर सान्त्वना जित हात पार्यो ।
वर्षाले प्रभावित भएपछि १० ओभरमा छोट्याइएको खेलमा टस जितेर ब्याटिङ रोजेको मध्यमाञ्चलले चार विकेट गुमाएर ५७ रन बनाएको थियो । अन्तिम बलमा चौका सहयोगमा ६० रन जोड्दै मध्यपश्चिमाञ्चलले ५ विकेटको जित निकाल्यो ।
लक्ष्मी चौधरीले नटआउट ३९ रन जोड्दै मध्यपश्चिमको जितको आधार तय गरेकी थिइन् । वुमेन अफ द म्याच पनि चुनिएकी उनले ३३ बलको सामना गर्दै चार चौका प्रहार गरेकी थिइन् । कप्तान नेरी थापामगरले १० रन योगदान गरिन् ।
यसअघि मध्यमाञ्चलको इनिङ्समा सर्वाधिक २२ रन रचना अर्यालले जोडेकी थिइन् । नटआउट रहेकी उनले ३० बल खेलिन् । सीता श्रेष्ठले १५ बलमा १२ रन बनाएर उनलाई साथ दिएकी थिइन् । मध्यपश्चिमका अन्य ब्याट्सवुमेनले रनको दोहोरो अंक छुन सकेनन् ।
http://bit.ly/2a7SceD
