निर्माणाधीनमध्ये मेची अञ्चलकै ठूलो जलविद्युत् आयोजनाका रुपमा रहेको सो आयोजनाले करिडोरको पूर्णतापछि मात्र विद्युत् उत्पादन सुरु गर्ने रणनीतिअनुसार निर्माण अघि बढाएको हो ।
अरुण कोलबी पावर लिमिटेडले निर्माण गर्दै गरेको २५ मेगावाटको काबेली ‘बि वान’ले आगामी २०७४ कात्तिकमा निर्माण सम्पन्न गर्ने गरी आयोजना अघि बढाएको हो ।
पाँचथर र ताप्लेजुङको सिमानाबाट काबेली नदीमा निर्माणाधीन आयोजना काबेली करिडोरको पूर्णतामा सहयोग पु¥याउँदै निर्माण तीव्रताका साथ अघि बढेको छ ।
पाँचथरको थर्पु र ताप्लेजुङको थुम्बेदिन गाविसको सीमाबाट बग्ने इवा र काबेली नदीको दोभान नजिकैबाट ब्यारेज निर्माण गरी पाँचथरतर्फ पानी फकाई चार मि व्यासको फलामे पाइप मार्फत चार हजार ८०० मि लामो पानी बहने प्रणालीद्वारा नागी–९ जुठेभिरमा ट्यांक बनाई पानी खसालिनेछ ।
ट्यांकबाट तीन मि व्यासको फलामे पाइपबाट ३६३ मि तल टर्वाइनमा पानीले हिर्काई विद्युत् उत्पादन गरिनेछ । उक्त टर्बाइनमा ३५ हजार लि पानी प्रतिसेकेन्ड झर्नेछ ।
चार अर्ब लगानीमा सुरु भएको आयोजनाको ७० प्रतिशत लगानी नेपाल इन्भेस्टमेन्ट बैंक सहित विभिन्न वित्तीय संस्थाले व्यहोरेका छन् भने बाँकी लगानी आयोजना निर्माण कम्पनीले गर्नेछ । झन्डै १५ करोड रूपैयाँ लगानी पाँचथरवासीबाट हुनेछ । यसका लागि निकट भविष्यमा सेयर आह्वान गर्ने तयारी भइरहेको अरुण कोलबी पावर लिमिटेडले जनाएको छ ।
आयोजनाबाट उत्पादित विद्युत्ले समग्र देशको विद्युत्भार कटौतीमा साढे दुई घन्टा भार थाम्ने आयोजनाका प्राविधिक प्रमुख हस्तमान राईले बताए।
करिब ४०० भन्दा बढी रोपनी क्षेत्रफलमा फैलिएको आयोजनाले पाँचथरको नागी र थूपू गाविसमा मात्रै करिब रु छ करोडमा जग्गा खरिदमा खर्चेको जनाएको छ । रासस
