झापा / सिम्रिक यातायात ट्राभल्स एण्ड टुर्सले आज झापाको कनकाई नगरपालिका स्थित भुरुङ्गामा एक विशेष समारोहका साथ आफ्नो सेवा औपचारिक रूपमा शुभारम्भ गरेको छ । यो अवसरमा कम्पनीको नव प्राप्त सवारी साधनहरूको विधिवत पूजाआजा गरी नियमित सेवा प्रारम्भ गरिएको हो । कार्यक्रम जिल्ला ट्राफिक प्रहरी कार्यालय झापाका प्रमुख गणेश पौडेलको प्रमुख आतिथ्यतामा सम्पन्न भएको थियो ।
उहाँले यातायात क्षेत्रलाई व्यवस्थित, सुरक्षित र समयानुकूल बनाउन निजी क्षेत्रको योगदान महत्वपूर्ण रहेको बताउँदै, सिम्रिक यातायात ट्राभल्स एण्ड टुर्सले पूर्वी नेपालमा स्तरीय यातायात सेवा दिन सक्ने विश्वास व्यक्त गर्नुभयोे । साथै, यात्रुहरुको सुरक्षालाई उच्च प्राथमिकता दिनुपर्नेमा समेत उहाले जोड दिनुभएको थियो । त्यस्तै उहाले ट्राफिक नियमको पालना गरे सडक दुर्घटना कम हुने भन्दै त्यसतर्फ सचेत रहनपनि आग्रह गर्नुभएको थियो ।
कार्यक्रमको अध्यक्षता कम्पनीका अध्यक्ष रेबती प्रसाद पाण्डेले गर्नुभएको थियो । उहाले कम्पनीको लक्ष्य, उद्देश्य र भावी योजनाबारे जानकारी दिँदै यात्रु सेवा, समयपालन र व्यवहारमैत्री सेवा प्रवाह गर्न कम्पनी प्रतिबद्ध रहेको उल्लेख गर्नुभयो । उहाका अनुसार सिम्रिक यातायातले झापा, मोरङ, सुनसरी लगायतका जिल्लामा सेवा विस्तार गरेको जानकारी गराउनुभएको थियो । उहाले यात्रुहरुको सहजतानै आफुहरुको सफलता हुने उल्लेख गर्नुभयो । यस्तै कम्पनीकी प्रबन्ध निर्देशक शर्मीला अधिकारीले प्रमुख अतिथि लगायत उपस्थित सम्पूर्ण अतिथिहरूलाई मायाको चिनो प्रदान गर्नुका साथै कम्पनीप्रतिको विश्वास र सद्भावप्रति आभार व्यक्त गर्नुभयो । उहाँले यो कम्पनीले यातायात सेवा क्षेत्रमा नयाँ दृष्टिकोणसहित कार्य गर्ने प्रतिबद्धता जनाउनुभएको थियो ।
कार्यक्रममा स्थानीयहरु, यातायात व्यवसायी, सुरक्षाकर्मी, पत्रकार तथा विभिन्न क्षेत्रका विशिष्ट व्यक्तित्हरूको उपस्थिति रहेको थियो । गाडी पूजापछि सर्वसाधारणका लागि सेवा सञ्चालन गरिएको जानकारीपनि गराइएको थियो । साथै, यात्रुहरुलाई सहज, सुरक्षित र सुलभ सेवा प्रदान गर्ने उद्देश्यले कम्पनीले आधुनिक प्रविधिको समेत प्रयोग गर्ने जनाएको छ । सिम्रिकले झापाको काकडभिट्टा र गौरीगञ्ज – गुवालडुब्बा – गौरादह दमक त्यसैगरि मोरङको बिराटनगर र सुनसरीको धरानबाट आफ्नो सेवा बिस्तार गरेको जनाईएको छ । सार्वजनिक यातायातको क्षेत्रमा यात्रुहरुलाई फरक अनुभाव दिईने कम्पनीका प्रमुख कार्यकारी अधिकृत आयुस बोगटीले जानकारी दिनुभयो । सिम्रिक यातायात टुर्स एण्ड ट्राभल्सले यस सेवा शुभारम्भसँगै पूर्वी नेपालका यात्रुहरुका लागि विश्वासिलो, समयमै सेवा प्रदान गर्ने तथा यात्रामा सहजता ल्याउने कम्पनीका रूपमा आफूलाई स्थापित गर्ने लक्ष्य लिएको कम्पनीका ईन्चार्ज जिवन थापाले बताउनुभएको छ ।
