गौरीगंज ६, भदौ / झापाको गौरिगंज गाउँपालिका–२ परेवाखोपीस्थित सडकखण्डमा प्रहरीले लागुऔषधसहित तीन जनालाई नियन्त्रणमा लिएको छ।
प्रहरीका अनुसार आज दिउँसो करिब १२ बजे दक्षिण आपगाछीबाट पूर्वतर्फ तुलाचन चौक जाँदै गरेको प्र१–०१–०१३ प ७०९२ नम्बरको मोटरसाइकललाई नियमित चेकजाँच गर्ने क्रममा सो घटना फेला परेको हो।
चेकजाँचका क्रममा मोटरसाइकलको पछाडिको सिटमा सवार झापा दमक नगरपालिका–९ धरना टोल निवासी भिम मुण्डाको छोरा २९ वर्षीय डिकेश मुण्डाको साथबाट ब्राउन सुगर जस्तो देखिने लागुऔषध फेला परेको इलाका प्रहरी कार्यालय गौरीगंजले जनाएको छ। उक्त पदार्थ प्लास्टिकमा प्याक गरिएको अवस्थामा करिब ३ ग्राम १७० मिलिग्राम बरामद भएको हो।
सोही मोटरसाइकल चालक झापा गौरादह नगरपालिका–८ भुडेसिम्बल बस्ने ३० वर्षीय मनिक मण्डल र मोटरसाइकलमा सवार अर्का युवक २६ वर्षीय अमन ताजपुरीयालाई समेत प्रहरीले नियन्त्रणमा लिएको छ।
बरामद भएको पदार्थ परीक्षणका लागि आवश्यक प्रक्रिया अघि बढाइएको र घटनामा संलग्न तीनै जनामाथि थप अनुसन्धान भइरहेको जिल्ला प्रहरी कार्यालय झापाले जनाएको छ।
प्रहरीले लागुऔषध ओसारपसार तथा प्रयोग नियन्त्रणमा कडाइका साथ चेकजाँचलाई अझ प्रभावकारी बनाइएको बताएको छ। पछिल्ला दिनमा सीमावर्ती क्षेत्र हुँदै लागुऔषध भित्रिने र प्रयोग हुने घटनामा वृद्धि देखिएकोले प्रहरीले नियमित चेकजाँचलाई प्राथमिकतामा राखेको जनाएको छ।
यसअघि पनि झापाका विभिन्न नाका तथा सडकखण्डमा प्रहरीले चेकजाँच गर्ने क्रममा लागुऔषधसहित धेरैलाई नियन्त्रणमा लिई कारबाही अगाडि बढाएको थियो।
यस घटनाबारे स्थानीय बासिन्दाले प्रहरीको सतर्कताप्रति प्रसंसा गर्दै समाजलाई लागुऔषधमुक्त बनाउन अझ कडाइका साथ कदम चाल्नुपर्ने सुझाव दिएका छन्।
