गौरीगंज १, भाद्र / गौरीगंज गाउँपालिका वार्ड नं. ३ स्थित ठेकिटोला युवा समुहको आयोजनामा दोस्रो ठेकिटोला म्याराथुन प्रतियोगिता भव्यतापूर्वक सम्पन्न भएको छ । “स्वास्थ्यका लागि दौड, हाम्रा लागि दौड, देशका लागि दौड“ भन्ने मुख्य नाराका साथ श्रीकृष्ण जन्माष्टमीको अवसरमा आयोजना गरिएको सो प्रतियोगितामा स्थानीयदेखि अन्तर्राष्ट्रिय स्तरसम्मका धावकको सहभागिता रहेको थियो ।
१२ किलोमिटर दुरीको म्याराथुन ठेकीटोलाबाट सुरु भई चिल्हारासम्मको मार्ग तय गरिएको थियो । खुल्ला स्तरको यस प्रतियोगितामा नेपाल र भारतका नाम चलेका क्लबका धावकहरूले प्रतिस्पर्धा गरेका थिए । प्रतिस्पर्धीहरूबीच कडा प्रतिस्पर्धा भए पनि अन्ततः उत्कृष्ट प्रदर्शन गर्ने खेलाडीहरूले पहिलो, दोस्रो र तेस्रो स्थान हासिल गर्न सफल भए । विजेतालाई आकर्षक नगद पुरस्कारसहित सम्मान गरिएको थियो ।
आयोजक समितिका अध्यक्षका शुसिल राईका अनुसार प्रथम स्थान हासिल गर्ने धावकले नगद २१ हजार रुपैयाँ पुरस्कार पाए भने दोस्रो हुनेले १० हजार रुपैयाँ र तेस्रो हुनेले ५ हजार रुपैयाँ प्राप्त गरे । यस बाहेक अन्य उत्कृष्ट प्रदर्शन गर्ने खेलाडीहरूलाई पनि प्रोत्साहन स्वरूप सम्मान गरिएको थियो ।
समापन कार्यक्रममा गाउँपालिकाकी अध्यक्ष फूलवती राजवंशी र उपाध्यक्ष पुजन न्यौपाने कुवँर, वार्ड नं. ३ का वडा अध्यक्ष श्रवण गिरीले विजयी खेलाडीहरूलाई पुरस्कार वितरण गर्दै यस्ता खेलकुद गतिविधिले युवामा ऊर्जा, अनुशासन र स्वस्थ जीवनशैलीलाई प्रवद्र्धन गर्ने बताए । ठेकिटोला युवा क्लवले दोस्रो संस्करणमै ठूलो संख्यामा सहभागीता र भव्य आयोजना गर्न सफल भएको भन्दै आगामी वर्षहरूमा अझ व्यवस्थित र आकर्षक बनाउन योजना बनाइरहेको जनाएको छ । प्रतियोगिताले स्थानीय युवाहरूमा उत्साह थप्नुका साथै राष्ट्रिय–अन्तर्राष्ट्रिय स्तरका खेलाडीलाई एकै मञ्चमा ल्याएकोमा सहभागी र दर्शकहरूले आयोजकलाई धन्यवाद व्यक्त गरेका छन् ।
१२ किलोटिरको म्याराथुन प्रतियोगितामा नेपाल प्रहरी क्लब काठमाडौंका नागेश्वर ऐर (यादव) प्रथम भए । उनले २१ हजार रुपैयाँ नगदसहित प्रमाण पत्र पाएका थिए भने दोस्रो लेटाङ्ग मोरङ्गका विक्रम लिम्ब भएका थिए । उनले १० हजार रुपैयाँ र प्रमाणपत्र पाएका थिए भने इन्डियन आर्मी पाँचथरका मिसान आङदेम्बे तेस्रो भएका थिए । उनले नगद ५ हजार रुपैयाँ सहित प्रमाणपत्रले पुरस्कृत भएका थिए । त्यसैगरी पवन राई चौथो, सरोज राई पाचौ, धनु मानन्धर छैटो, राजेन्द्र लिम्बु सातौ, करत रावल आठौ, रमेश लिम्बु नवौं र अमिर लिम्बु दशौं भएका थिए । महिला तर्फ दमककी पुस्पा शेर्मा लिम्बु प्रथम, उर्लावारी की मन्दिरा महत्तरा दोस्रो र दमककी यादीका देवान तेस्रो भएकी थिइन । उनीहरुलाई नगदसहित प्रमाणपत्रले पुस्कृत गरिएको थियो । आयोजक समितिका अध्यक्ष शुसिल राईको अध्यक्षतामा कार्यक्रम सम्पन्न भएको थियो ।
