नारायण राजवंशी
दमक, झापा / इसाई समाज नगर समिति दमकको आयोजनामा आयोजित एक दिवसीय रक्तदान कार्यक्रम सफलतापूर्वक आज बुधवार सम्पन्न भएको छ। दमक नगरपालिकास्थित एक सामुदायिक भवनमा सम्पन्न सो कार्यक्रममा ४८ जना महिला र ८८ जना पुरुष गरी कुल १३६ जनाले स्वेच्छिक रक्तदान गरेका छन्।
रक्तदान कार्यक्रमको अध्यक्षता समितिका अध्यक्ष हेमन्त वान्त्वाले गरेका थिए। कार्यक्रममा दमक नगरपालिकाकी उपमेयर रेजिना भट्टराई प्रमुख अतिथिका रूपमा उपस्थित थिइन् भने रेडक्रस रत्त सञ्चार सेवा दमकका प्रमुख सिद्धार्थ दाहाल, सामाजिक अभियन्ता प्रकाश बुढाथोकीलगायतको विशेष उपस्थिति थियो।
कार्यक्रममा सहभागी अतिथिहरूले नियमित रक्तदानले ज्यान बचाउन सहयोग पुग्ने मात्र नभई स्वयं दाताको स्वास्थ्यका लागि पनि लाभदायक हुने बताउँदै यसप्रकारका मानवीय क्रियाकलापलाई निरन्तरता दिनुपर्नेमा जोड दिए। उपमेयर भट्टराईले युवाहरूमा सामाजिक सेवाप्रतिको अभिवृत्ति बढ्दै गइरहेको बताउँदै इसाज समाजको यो पहल सराहनीय भएको उल्लेख गरिन्।
रक्तदानमा सहभागी प्रत्येक रक्तदातालाई इसाई नगर समितिको तर्फबाट फलफूलका विरुवाहरू वितरण गरिएको थियो। वितरण गरिएका विरुवामा अम्बक, अमला र सिरिसजस्ता उपयोगी र औषधीय गुण भएका विरुवाहरू समावेश थिए। आयोजक समितिका अनुसार, रक्तदानमार्फत समाजसेवा मात्र नभई वातावरण संरक्षणप्रति समेत जनचेतना फैलाउने उद्देश्यले रक्तदातालाई विरुवा वितरण गरिएको हो।
समितिका अध्यक्ष वान्त्वाले आगामी दिनमा पनि यस्ता कार्यक्रमलाई नियमितरूपमा सञ्चालन गर्ने प्रतिबद्धता जनाउँदै, समाजको स्वास्थ्य र वातावरण दुवैलाई सन्तुलनमा राख्न यस्ता संयुक्त प्रयास आवश्यक रहेको बताए। उनले सहभागी सबै रक्तदातालाई धन्यवाद दिँदै, “सामूहिक रक्तदानजस्ता कार्यमार्फत हामी समाजमा सकारात्मक सन्देश दिन सक्छौं,” भने।
कार्यक्रममा इसाज समाजका सदस्य, स्थानीय स्वयंसेवी, विभिन्न विद्यालयका विद्यार्थी तथा सञ्चारकर्मीको उपस्थिति रहेको थियो। कार्यक्रम अन्त्यमा सहभागी रक्तदाताहरूमाझ प्रमाणपत्रसमेत वितरण गरिएको थियो।
यस रक्तदान कार्यक्रमले समाजमा सकारात्मक प्रभाव पार्नुका साथै स्वास्थ्य र वातावरणप्रतिको जिम्मेवारीबोध गराउने कार्यमा टेवा पुर्याएको आयोजक पक्षको विश्वास रहेको छ।
