गौरादह १३, भदौ / समाजमा दिनानुदिन बढ्दै गएको लागूऔषध दुरुपयोग र त्यसबाट हुने विनाशकारी परिणामप्रति सचेतना जगाउने उद्देश्यले निर्माण गरिएको लघु चलचित्र ‘परिणाम’ शुक्रबार गौरादहमा सार्वजनिक गरिएको छ ।
गौरादह नगरपालिकासँगको साझेदारीमा दर्पण कला संसार गौरादहले निर्माण गरेको उक्त लघु चलचित्रको सार्वजनिकता एक विशेष समारोहका बीच सम्पन्न भएको हो । नगरप्रमुख छत्रपति सुवेदीले पानसमा दियो बालेर र उपप्रमुख जलवर्षा राजवंशीले ल्यापटपमा माउस क्लिक गरी चलचित्र सार्वजनिक गरे ।
गौरादह नगरपालिकाले यस किसिमका सचेतनामूलक सिर्जनात्मक गतिविधिमा सहकार्य गर्दै आएको छ । नगरप्रमुख सुवेदीले कार्यक्रममा बोल्दै, लागूऔषधले युवा पुस्तालाई अन्धकारतर्फ धकेलिरहेको बेला यस्ता चलचित्रले चेतना अभिवृद्धि गर्न सहयोग पुर्याउने विश्वास व्यक्त गरे ।
उपप्रमुख राजवंशीले युवालाई सिर्जनात्मक, सकारात्मक गतिविधिमा संलग्न गराउन नगरपालिका निरन्तर काम गरिरहेको उल्लेख गर्दै चलचित्र ‘परिणाम’ पनि त्यसै अभियानको एउटा महत्वपूर्ण प्रयास भएको बताइन् ।
‘परिणाम’ लघु चलचित्रलाई हरि बस्नेत (डी.के) ले लेखन, कथा र निर्देशन गरेका छन् । चलचित्रको छायांकन तथा सम्पादन मुहा सिंह थापा मगरले गरेका छन् भने सह–निर्देशक तथा नियन्त्रकमा भुवन खड्का रहेका छन् । यसैगरी श्रृंगार तथा सह–छायांकनमा सोम मंग्राती, प्रकाशमा सुमन मंग्राती संलग्न छन् । व्यवस्थापकका रूपमा नारायणचन्द्र राजवंशी, युवराज खड्का, पूजा निरौला, मिना बराल, गंगा भट्टराई र लक्ष्मी चिमरियाको योगदान रहेको छ ।
सार्वजनिक कार्यक्रममा प्रमुख प्रशासकिय अधिकृत कृष्णप्रसाद सुवेदी, गौरादह नगरपालिका वडा नं. १ का अध्यक्ष नगेन्द्र भण्डारी, वडा नं. ७ का अध्यक्ष बलराम खरेल, वडा नं. ३ का अध्यक्ष दिलीप कुमार भण्डारीलगायत कार्यपालिका सदस्य, जनप्रतिनिधि, विभिन्न संघ–संस्थाका प्रमुख तथा स्थानीय नागरिकहरूको उल्लेखनीय उपस्थिति थियो ।
लघु चलचित्र ‘परिणाम’ केवल मनोरञ्जनका लागि नभई समाजमा व्याप्त गम्भीर समस्या लागूऔषधको लत विरुद्ध सचेतना जगाउने अभियानकै हिस्सा हो । पछिल्लो समय लागूऔषध प्रयोग गर्ने युवाको संख्या बढ्दै गएको छ । यसले परिवार मात्र नभई समुदाय, स्वास्थ्य र सामाजिक सुरक्षा सबै क्षेत्रमा नकारात्मक असर पुर्याइरहेको छ ।
यस्तो अवस्थामा चलचित्रमार्फत सन्देश दिने प्रयास विशेष महत्व राख्छ । चलचित्रले लागूऔषध सेवनको तत्कालीन क्षणिक आनन्दभन्दा पनि दीर्घकालीन दुस्खद परिणामलाई चित्रण गरेको आयोजकले बताए । समाजका सबै वर्गलाई लक्षित गरी तयार गरिएको यस फिल्मले अभिभावक, शिक्षक, विद्यार्थी, समुदायका अगुवालगायत सबैलाई सजग गराउने उद्देश्य लिएको छ ।
‘परिणाम’ केवल एक लघु चलचित्र मात्र होइन, समाजलाई लागूऔषधमुक्त बनाउन सबै पक्षलाई एकजुट हुन प्रेरित गर्ने सामाजिक अभियानको प्रतिविम्ब हो । कार्यक्रमको अध्यक्षता देवी बहादुर निरौला, लघुकथाको महत्व र उदेश्यमाथि प्रकाश युवराजन खड्का, स्वागत पूजा निरौला र कार्यक्रमको
सञ्चालन निर्मला रिमाल तथा भुवन खड्काले गरेका थिए ।
