झापा, १९ चैत । धान, सुपारी, रबर, मकैपछि झापामा माछा र तरकारी जोन कार्यक्रम सञ्चालनमा आएको छ । प्रधानमन्त्री कृषि आधुनिकीकरण परियोजना अन्तर्गत जिल्लाको चार पालिकामा ‘माछा जोन कार्यक्रम’ थपिएको हो ।
चालु आर्थिक बर्ष २०८१/०८२ बाट शिवसताक्षी, गौरादह, कमल र गौरीगञ्ज पालिकाको सबै वडामा ‘माछा जोन कार्यक्रम’ सञ्चालन भइरहेको प्रधानमन्त्री कृषि आधुनिकीकरण परियोजनाका सूचना अधिकारी रविन निरौलाले बताउनुभयो ।
एउटै किसिमको बालीको उत्पादन हुने ५०० हेक्टर क्षेत्रफललाई समेटेर सरकारले जोन घोषणा गर्दै विभिन्न सहुलियत र सहयोग कार्यक्रम सञ्चालन गर्दै आएको छ ।
चार पालिकाका ४९ वटा कृषि फर्म र चार वटा कृषक समूहका ११६ जना महिलासहित २२० जना कृषकहरु माछा जोन कार्यक्रममा सूचीकृत रहेको निरौलाले जानकारी दिनुभयो ।
गौरीगञ्ज वडा नं. ३ स्थित गोदावरी कृषक समूह र शिवसताक्षी वडा नं. २ को नमुना कृषक समूहमा सबैभन्दा बढी २५/२५ जना कृषक माछा जोन कार्यक्रममा आवद्ध रहेका छन् ।
माछा जोनतर्फ मत्स्य प्रवद्र्धन, माछाको उन्नत प्रविधि प्रवद्र्धन, एकीकृत माछा पालन, ह्याचरी निर्माण, पोखरी निर्माण तथा सिञ्चाइ, पोखरी मर्मतलगायतका क्षेत्रमा परियोजनाले काम गरिरहेको छ । चालु आवमा सरकारले माछा जोनका लागि झापामा रु. एक करोड ७८ लाख बजेट विनियोजन गरेको छ ।
यसैगरी, मेचीनगर नगरपालिकाको वडा नं. १, २, ३, ८ र ९, बुद्धशान्ति गाउँपालिकाको वडा नं. ५, ६ र ७ र अर्जुनधारा नगरपालिकाको वडा नं. ८ र ९ को पाँच सय हेक्टरमा ‘तरकारी जोन कार्यक्रम’ लागू गरिएको छ ।
माछा र तरकारी उत्पादनको क्षेत्र विस्तार गरी उत्पादनलाई उद्योगसँग जोड्ने र किसानलाई व्यावसायिकरण गर्ने उद्देश्यले यी दुई जोन कार्यक्रम थप गरिएको उहाँले बताउनुभयो ।
‘तरकारी जोन कार्यक्रम’का लागि रु. एक करोड चार लाख बजेट विनियोजन भएको छ । व्यावसायिक तरकारी खेती विस्तार, बेमौसमी तरकारी खेती, तरकारी प्रशोधन केन्द्र, साना मेसिनरी औजार उपकरण, कम्पोस्ट मल उत्पादन, थोपा सिंचाई लगायतमा कृषकलाई ५० प्रतिशत अनुदान प्रदान गरिँदै आएको उहाँले बताउनुभयो ।
उहाँले कृषि फार्म, सहकारी र समूहमार्फत जोन क्षेत्रमा काम भइरहेको बताउनुभयो । कृषिमा आधारित अर्थतन्त्रबाट कृषिजन्य उद्योगमा रुपान्तरित आधुनिक, व्यावसायिक दीगो एवम् आत्मनिर्भर कृषि क्षेत्रको विकास गर्ने उद्देश्यका साथ झापामा आर्थिक बर्ष २०७३/७४ मा धान सुपरजोन परियोजना सुरु गरिएको थियो । (साभार लोकतन्त्र पोस्टबाट)
