१ श्रावण २०८१, मंगलबार | Tue Jul 16 2024

सहकारी दिवसमा वृहत मानव साङ्लो प्रदर्शन तयारी


१७ असार २०७३, शुक्रबार  

0
Shares

दमक १७, असार/ ९४ औं अन्तर्राष्ट्रिय सहकारी दिवसको अवसरमा असार १८ गते देशैभर वृहत मानव साङ्लो प्रदर्शन गरिने भएको छ ।

13556-20160701131550_700x700

मेची महाकाली मानव साङलो प्रदर्शनको लागि देशैभर स्थापित सहकारी संघ–संस्था र विषयगत संघहरुले तयारी तीब्र बनाएका छन् । हरेक वर्ष जुलाई महिनाको पहिलो शनिबार अन्तरर्राष्ट्रिय सहकारी दिवस मनाउने गरिन्छ । सोही अनुसार असार गते १८ गते, २ जुलाइका दिन नेपालमा मानव साङ्लो प्रदर्शन गर्न लागिएको हो ।

अन्तरर्राष्ट्रिय सहकारी महासंघको आह्वानमा ‘सहकारिताः दिगो भविष्य निर्माणका लागि शक्ति’ मूल नाराका साथ विश्वभर मानव साङलो प्रदर्शन गर्ने कार्यक्रम छ । नेपालमा पनि महासंघको निर्देशनअनुसार यस्तो कार्यक्रम अन्य रचनात्मक क्रियाकलापसहित आयोजना गर्ने निर्णय भएको छ ।

बिहान ७ बजेदेखि ९ बजेसम्म देशैभरका सहकारीकर्मीहरु मुख्य राजमार्गमा उभिएर मानव साङ्लो प्रदर्शन गर्ने तयारी भएको जनाइएको छ । मेची–महाकाली विशाल मानव साङ्लो प्रदर्शनीमा भाग लिन राष्ट्रिय सहकारी संघले आव्हान पनि गरेको छ ।

सहकारी आन्दोलन प्रतिको ऐक्यवद्धता तथा सहकारीलाई दिगो भविष्य निर्माणको लागि आधारशिलाको रुपमा स्थापित गर्न छिमेकी सहकारी संघ–संस्थाहरूसँग समन्वय र सहकार्य गरी आ–आफ्नो पायक पर्ने स्थानमा भेला भई सहकारीको झण्डा हातहातमा लिई मानव साङ्लो प्रदर्शनीमा भाग लिन केन्द्रीय संघले आव्हान गरेको हो ।

झापामा पनि तीब्र तयारी, सहभागिताका लागि आह्वान

झापामा पनि यसको तयारी तीव्र पारिएको छ । राष्ट्रव्यापी कार्यक्रम अन्तरगत मानव साङ्लो प्रदर्शनका लागि झापा जिल्ला सहकारी सङ्घले झापाका सबै सहकारी संस्था र तिनका सदस्यलाई सहभागिताका लागि आह्वान गरेको छ ।

काँकरभिट्टा, बिर्तामोड र दमकमा राजमार्ग केन्द्रित हुने गरी मानव साङ्लो प्रदर्शन गर्ने तयारी भइरहेको झापा जिल्ला सहकारी सङ्घका अध्यक्ष गणेश ढकालले बताए । सङ्घका सहसचिव भवानीप्रसाद दङ्गालका अनुसार सहकारी मैत्री ऐन कानुन निर्माणका लागि राज्यलाई नैतिक दवाव दिन पनि यो कार्यक्रम देशव्यापी रुपमा आयोजना गरिएको हो ।

बिहान ७ बजे राष्ट्रिय सहकारी सङ्घका पूर्व सञ्चालक, अगुवा सहकारीकर्मी रामचन्द्र उप्रेतीले काँकडभिट्टामा मानव साङ्लोको उद्घाटन गर्ने कार्यक्रम छ । सो मानव साङ्लो झापा मोरङको सीमावर्ती मावा खोलामा गएर जोडिनेछ । त्यहाँ राष्ट्रिय सहकारी बैंङ्कका अध्यक्ष रमेश पोखरेलले सम्बोधन गर्ने कार्यक्रम तय भएको छ ।

को–को छन् सम्पर्क व्यक्ति
झापा जिल्ला सहकारी सङ्घले तीनवटा ब्लक छुट्टयाएर कार्यक्रमको तयारी गरेको छ । तीनवटै व्लकमा अलग–अलग सम्पर्क व्यक्ति तोकिएका छन् । काँकडभिट्टामा हिम्मत क्षेत्री र कमल काफ्लेलाई जिम्मेवारी दिइएको छ ।

विर्तामोडमा सङ्घका सह सचिव भवानीप्रसाद दङ्गाल र जिल्ला सदस्य कृष्णप्रसाद मिश्र सम्पर्क व्यक्ति छन् । दमकमा प्रेम कोइराला र मणि भण्डारीलाई जिम्मेवारी दिइएको छ ।

राष्ट्रिय सहकारी सङ्घको निर्देशनात्मक आदेशमा तय भएको यो कार्यक्रममा सहभागिता चुनौतिपूर्ण देखिएको छ । ‘यद्यपि तीव्र रुपमा भइरहेको तयारीका कारण उल्लेख्य सहभागिता रहनेमा सङ्घ विश्वस्त छ’, सङ्घका सहसचिव भवानीप्रसाद दङ्गालले भने ‘सहकारीमा आवद्ध सबै सदस्यको सहभागिताका लागि प्रयत्न गरिरहेका छौँ ।’

प्रकाशित मिति : १७ असार २०७३, शुक्रबार  १ : ०८ बजे