गौरीगंज १६, पौष / गर्भवती महिलाहरूको मातृ तथा शिशु स्वास्थ्य सुरक्षालाई थप प्रभावकारी बनाउने उद्देश्यले गौरीगंज गाउँपालिकाले निशुल्क भिडियो एक्स–रे (अल्ट्रासाउण्ड) सेवा सञ्चालनमा ल्याएको छ। गाउँपालिकाले स्वीकृत गरेको वार्षिक कार्यक्रम अन्तर्गत सुरु गरिएको यो सेवा आगामी पौष २० गतेदेखि नियमित रूपमा सञ्चालन हुने भएको हो।
गौरीगंज गाउँपालिका अन्तर्गतका वार्ड नं. १ देखि ६ सम्मका सबै स्वास्थ्य चौकीहरूबाट गर्भवती महिलाहरूले यो सेवा निशुल्क रूपमा लिन सक्नेछन्। गाउँपालिकाले हरेक महिना सञ्चालन गर्ने गरी योजना बनाएको यस कार्यक्रमले गर्भावस्थामा आवश्यक स्वास्थ्य परीक्षणलाई सहज, पहुँचयोग्य र सुरक्षित बनाउने अपेक्षा गरिएको छ।
गर्भावस्थाको समयमा समयमै अल्ट्रासाउण्ड जाँच गरिनु आमाको स्वास्थ्य र गर्भमा रहेको शिशुको अवस्थाको मूल्यांकनका लागि अत्यन्त महत्वपूर्ण मानिन्छ। तर आर्थिक अवस्था कमजोर भएका तथा दुर्गम बस्तीमा बसोबास गर्ने महिलाहरूका लागि निजी स्वास्थ्य संस्थामा पुगेर अल्ट्रासाउण्ड सेवा लिन कठिन हुने गरेको थियो। यही समस्यालाई ध्यानमा राख्दै गाउँपालिकाले स्थानीय तहमै निशुल्क सेवा उपलब्ध गराउने पहल गरेको हो।
गौरीगंज गाउँपालिकाकी अध्यक्ष फूलवती राजवंशीका अनुसार मातृ मृत्युदर न्यूनीकरण र सुरक्षित मातृत्व सुनिश्चित गर्नु गाउँपालिकाको प्राथमिकतामा रहेको विषय हो। “गर्भवती महिलाले समयमै स्वास्थ्य परीक्षण गराउन सकून् भन्ने उद्देश्यले यो कार्यक्रम ल्याएका हौँ। आर्थिक अभावका कारण कुनै पनि आमा स्वास्थ्य सेवाबाट वञ्चित हुनु हुँदैन,” अध्यक्ष राजवंशीले बताउनुभयो।
स्वास्थ्य शाखाका अनुसार अल्ट्रासाउण्ड सेवाबाट गर्भको अवस्था, शिशुको विकास, सम्भावित जोखिम तथा जटिलता पहिचान गर्न सहयोग पुग्नेछ। यसले जोखिमयुक्त गर्भावस्थालाई समयमै रेफर गर्न र आवश्यक उपचारको व्यवस्था मिलाउन सहज बनाउने विश्वास गरिएको छ।
स्थानीय स्वास्थ्य चौकीका स्वास्थ्यकर्मीहरू पनि यो कार्यक्रमले सेवाग्राहीको विश्वास बढाउने बताएका छन्। उनीहरूका अनुसार पहिले गर्भवती महिलाहरू सामान्य परीक्षणमा मात्रै सीमित हुने गरेका थिए। अब भने भिडियो एक्स–रे सेवा उपलब्ध भएपछि गर्भवस्थाको अवस्था स्पष्ट रूपमा बुझ्न सकिनेछ, जसले आमा र शिशु दुवैको स्वास्थ्य सुरक्षामा योगदान पुर्याउनेछ।
सेवा सुरु हुने खबरले स्थानीय गर्भवती महिलाहरूमा पनि उत्साह थपिएको छ। वार्ड नं. ४ की एक गर्भवती महिलाले भनिन्, “अल्ट्रासाउण्ड गर्न टाढा जानुपर्थ्यो, खर्च पनि धेरै लाग्थ्यो। अब आफ्नै स्वास्थ्य चौकीमा निशुल्क सेवा पाउँदा निकै राहत मिलेको छ।”
गाउँपालिकाले आगामी दिनमा पनि स्वास्थ्य सेवालाई अझ प्रभावकारी, गुणस्तरीय र सर्वसुलभ बनाउँदै लैजाने योजना रहेको जनाएको छ। मातृ तथा नवजात शिशु स्वास्थ्य सुधारका लागि यस्ता कार्यक्रम निरन्तर सञ्चालन गरिने गाउँपालिकाको प्रतिबद्धता छ।
निशुल्क भिडियो एक्स–रे सेवा सञ्चालनसँगै गौरीगंज गाउँपालिकामा सुरक्षित मातृत्वको अभियानले नयाँ गति लिएको छ। यसले ग्रामीण क्षेत्रका गर्भवती महिलाहरूको स्वास्थ्य पहुँचमा सुधार ल्याउने र स्वस्थ समाज निर्माणमा महत्वपूर्ण योगदान पुर्याउने विश्वास गरिएको छ।
