आत्माराम राजवंशी
गौरीगंज १५, भदौ / गाउँ–गाउँका युवालाई खेलमार्फत अनुशासन र आत्मविश्वास दिलाउन लागिपरेका छन् रुपक थुलुङ राई । झापाको गौरीगंज गाउँपालिका–३, दन्तकाली बसोबास गर्ने रुपक सामान्य परिवारका हुन् । बुवा रामबहादुर राई र आमा मेनुका देवी लिम्बुका माइलो छोरा उनी १८ वर्ष नेपाली सेनामा सेवा दिँदै तेक्वान्डोमा ब्ल्याक बेल्ट ३ डनसम्मको उपाधि हासिल गर्न सफल भएका थिए । तेक्वान्डो प्रशिक्षक रुपक थुलुङ राई श्रीमति पुनम राई र दुई छोराहरु रोहन राई र रेमन राई संगै बस्दै आएका छन् । उनले आफ्ना जेठो छोरा रोहनलाई पहिलो डन ब्ल्यक बेल्ट प्राप्त गराइसकेका छन भने कान्छा छोरा रेमनलाई पनि यसै खेलमा समाहित गराईरहेका । उनी सेनामै हुदाँ सैनिक सेवा पदक, युएन मेडल (लेब्नान) र प्रदेश सेवा पदकबाट सम्मानित भइसकेका छन् । यही अनुभवलाई गाउँमै ल्याएर उनले नयाँ पुस्तालाई खेलकुदतर्फ आकर्षित गरिरहेका छन् ।
“घर–घरमा खेलाडी, टोल–टोलमा डोजाङ्ग” भन्ने नारासहित स्थापना गरिएको गौरीगंज तेक्वान्डो डोजाङ्ग अहिले ग्रामीण क्षेत्रमा खेलाडी उत्पादन गर्ने ठाँउका रूपमा चिनिएको छ । गाउँमै डोजाङ्ग स्थापना गरेर रुपकले अहिलेसम्म १०० भन्दा बढी युवालाई तालिम दिइसकेका छन् । तीमध्ये ३ जना महिला र ११ जना पुरुष गरी १४ जना खेलाडीलाई उनले ब्ल्याक बेल्टसम्म पुर्याइसकेका छन् ।
उनको प्रशिक्षणको नतिजा अहिले देखिन थालिएको छ । रुपककै मार्गदर्शनमा प्रशिक्षित खेलाडीहरुले जिल्लास्तरीय राष्ट्रपति रनिङ शिल्ड प्रतियोगिता २०८० मा २ वटा स्वर्ण पदक जितेका थिए भने २०८१ सालमा ३ वटा स्वर्ण पदक गाउँपालिकाको नाममा जोड्न सफल भए । यी उपलब्धिहरुले गाउँ मात्र होइन, जिल्लाभरका अभिभावक र युवामा पनि उत्साह थपेको छ ।
रुपकले ग्रामीण युवामा लुकेर बसेको क्षमता बाहिर निकाल्ने प्रयत्न गरिरहेका छन् । उनी भन्छन्, “हामीसँग खेल्न सक्ने उत्साह र क्षमता छ, तर अवसर र प्लेटफर्मको कमी हुन्छ । त्यसैले गाउँमै डोजाङ्ग स्थापना गरेर अवसर सिर्जना गर्ने सोच लिएको हुँ ।”
आज डोजाङ्गमा दैनिक प्रशिक्षण लिने युवाहरु अनुशासन, आत्मरक्षा र आत्मविश्वास सिकिरहेका छन् । गाउँकै टोलटोलमा बालबालिकादेखि किशोरकिशोरीसम्म प्रशिक्षणमा सहभागी भइरहेको देख्दा अभिभावकहरु पनि ढुक्क बनेका छन् । उनीहरुले आफ्ना छोराछोरीलाई खेलमार्फत सही बाटोमा डोर्याउन सकिने आशा गरेका छन् ।
रुपक थुलुङ राईको योगदान केवल प्रशिक्षकको हैसियतमा सीमित छैन । उनले गाउँपालिकाको नाम उच्च बनाउन खेलेको भूमिका उल्लेखनीय छ । जिल्ला, प्रदेश हुँदै राष्ट्रिय स्तरसम्म खेलाडी पठाउने उनको लक्ष्य अझै ठुलो छ । अन्तर्राष्ट्रिय मञ्चमा पनि गौरीगंजका खेलाडी देख्ने सपना बोकेर उनी निरन्तर अघि बढिरहेका छन् ।
सहर वा विदेश जानुपर्ने बाध्यता बीच गाउँमै बसेर केही गर्न सकिन्छ भन्ने जीवन्त उदाहरण बनेका छन् रुपक । उनले देखाएको बाटो आजको पुस्ताका लागि मात्र होइन, भविष्यका पुस्ताका लागि पनि प्रेरणादायी छ ।
गौरीगंजको सामान्य गाउँबाट सुरु भएको यो पहल, अब गाउँकै भित्ताबाट अन्तर्राष्ट्रिय रंगशालातर्फ डोर्याउने सम्भावनामा परिणत हुनेछ ।
