शिवसताक्षी ८, भदौ / अखिल नेपाल महिला संघ (क्रान्तिकारी) शिवसताक्षी नगर कमिटीले आयोजना गरेको नगर भेला तथा हरितालिका तीज विशेष कार्यक्रम २०८२ आज आइतबार शिवसताक्षीमा सम्पन्न भएको छ ।
कार्यक्रममा पार्टी नेतृत्व तथा विभिन्न स्तरका कमिटी सदस्यहरूको उपस्थिति रहेकाले कार्यक्रम विशेष उत्साहका साथ सम्पन्न भएको हो ।
प्रमुख अतिथिका रुपमा पार्टीका केन्द्रीय सदस्य तथा पूर्व कृषिमन्त्री झलकसिं दर्लामि, विशिष्ट अतिथिका रुपमा १ नम्बर प्रदेश कमिटी सचिवालय सदस्य कल्पना कार्की र अनेम संघ (क्रान्तिकारी) प्रदेश सचिव भूमिका कोईरालासहित अन्य नेतृहरुको उपस्थिति रहेको थियो भने कार्यक्रमको सभाध्यक्षता नेकपा माओवादी केन्द्र शिवसताक्षी नगर कमिटीका अध्यक्ष दुर्गा नेम्बाङले गर्नुभएको थियो ।
त्यसैगरी जिल्ला कमिटी सदस्य तथा नगर इन्चार्ज एन.पी. लामिछाने, जिल्ला कमिटी सदस्य रामजी कार्की, पूर्व नगर उपाध्यक्ष गणेश बजगाई, अनेम संघ क्रान्तिकारी जिल्ला उपाध्यक्ष कचालि ताजपुरिया, जिल्ला सदस्य अम्बिका आचार्य लगायत नेतृ तथा कार्यकर्ताहरूको समेत सहभागिता रहेको थियो ।
कार्यक्रमको औपचारिक सत्रमा स्वागत मन्तव्य कचालि ताजपुरियाले राख्नुभएको थियो भने नगर अध्यक्ष दुर्गा नेम्बाङले कार्यक्रमको औचित्यबारे प्रस्तुत गर्नुभएको थियो ।
प्रमुख अतिथि झलकसिं दर्लामिले शुभकामना मन्तव्य व्यक्त गर्दै महिला संघको भूमिका सशक्त बनाउन, संगठनलाई अझ सबल बनाउँदै समाज रूपान्तरणतर्फ अघि बढ्न आग्रह गर्नुभयो ।
कार्यक्रमका संयोजक रिता लामा थापाको संयोजकत्वमा २१ सदस्यीय नयाँ नगर कमिटी गठन गरिएको छ । नयाँ कमिटी गठनसँगै संगठनलाई थप गतिशील बनाउन एकमत भएको बताइएको छ ।
साँस्कृतिक नाचगानसहित सम्पन्न कार्यक्रममा एक सयभन्दा बढी महिला तथा सहभागीहरूको उपस्थिति रहेको आयोजकले जनाएको छ । विशेषगरी तीज पर्वलाई केन्द्रित गरी महिलाहरुको सामूहिक नृत्य प्रस्तुत गरिएको थियो । सामूहिक नृत्य, गीतसंगीत र रमाइलोका बीचमा महिलाहरूले आफ्नो सांस्कृतिक पहिचान झल्काएका थिए ।
कार्यक्रमको सञ्चालन पार्टी नगर कमिटीका सह–सचिव देविका खनालले गर्नुभएको थियो भने कार्यक्रमका अन्त्यमा सहभागीहरूलाई दर खानेकुरासहित खानपानको व्यवस्था गरिएको थियो ।
